Hefð er orðin fyrir því að forsala á árlegt þorrablót Grindavíkinga hefjist á Fjörugum föstudegi. Á því veður engin breyting í ár en Fjörugur föstudagur verður 22. nóvember næstkomandi. Að venju verður dagskrá með glæsilegasta móti en hljómsveitin Made in sveitin mun leika fyrir dansi. Hinn landsþekkti fréttamaður og stjórnandi Landans, Gísli Einarsson verður veislustjóri og Siggi Þyrill verður blótsgoði. Forsalan mun fara fram eins og áður segir föstudaginn 22. nóvember á veitingastaðnum Papa´s frá klukkan 20:00 - 22:00. Fram kemur á Facebook síðu viðburðarins að mikil stemning hafi myndast í forsölunni síðustu ár. Verður sá háttur á að eingöngu verður hægt að taka frá sæti gegn keyptum miða. Uppselt hefur verið á þorrablótið undanfarin ár.