Hærri laun, lengri helgarfrí og snúðar með kaffinu

• Fréttir
• 2. júlí 2019

Nemendur í Vinnuskóla Grindavíkur hafa lagt sig fram um að halda bænum okkar snyrtilegum í sumar. Þessa vikuna er hefðbundið starf Vinnuskólans brotið upp og settust nemendur t.d. niður í gær með stjórnendum skólans og glímdu við spurninguna hvernig Vinnuskóli Grindavíkur verði draumavinnustaður. Notast var við aðferðafræði sem nefnist heimskaffi þar sem nemendum var skipt niður í hópa sem ræddu sín á milli. 

Nemendurnir ræddu fjölmargar hugmyndir sem gætu gert Vinnuskóla Grindavíkur að enn betri vinnustað. Meðal hugmynda sem fram komu voru hærri laun, lengra helgarfrí, lengri kaffitímar, frjáls mæting þegar rignir og að Grindavíkurbær útvegi nemendum snúða í kaffitímum. Stjórnendur Vinnuskólans koma til með að vinna úr hugmyndum nemenda á næstu vikum og hafa þær í huga þegar skipulag næsta sumars er ákveðið.  

Meðfylgjandi  myndir voru teknar í Gjánni þegar hópurinn kynnti niðurstöður borðanna. 

• Síðast uppfært: 2. júlí 2019