Björgun fjár úr sjálfheldu tókst vel

  • Fréttir
  • 23. janúar 2019
Björgun fjár úr sjálfheldu tókst vel

Vel gekk að bjarga fjórum kindum af klettasyllu í Krísuvík, austan við Grindavík í gærkvöldi. Eigendur fjárins höfðu reynt árangurslaust í um viku, að koma því niður eftir að þær hlupu upp Bæjarfell og niður á sylluna. Eftir að hafa farið daglega að vitja þess var það niðurstaðan að óska eftir aðstoð frá Björgunarsveitinni Þorbirni. Otti Sigmarsson, varaformaður sveitarinnar sagði í samtali við grindavik.is að mjög vel hafi gengið að bjarga kindunum af syllunni. "Þetta gekk bara eins og í sögu, skemmtilegt verkefni og frábær æfing fyrir okkur. Bændurnir höfðu samband og athuguðu hvort við gætum aðstoðað þá. Það var lítið mál þannig að við fórum á mánudagskvöldið í smá könnunarleiðangur í frekar leiðinlegu veðri. Í gær var veðrið betra og við brunuðm bara um kvöldmat austur eftir og gengum beint til verks, gengum við upp á fjallið og settum upp línur á toppnum, sigum svo niður að rollunum og settum á þær hálfgert belti og hífðum þær svo upp í rólegheitum eina og eina í einu." 

Alls tóku 14 manns þátt í björguninni en meðfylgjandi myndir tóku bæði Otti Sigmarsson og Hanna Sigurðardóttir af björgunaraðgerðum. 

Ánægður hópur að lokinni björgunaraðgerð. 


Deildu ţessari frétt