Íslenskir grilláhugamenn eru sennilega farnir að þekkja Grindvíkinginn Alfreð Fannar Björnsson vel, en hægt er að fylgjast með honum grilla á Snapchat þar sem hann ber titilinn BBQ-kóngurinn með rentu. Nýjasta ævintýri Alla, eins og hann er jafnan kallaður, var að grilla stærsta hamborgara sem grillaður hefur verið á Íslandi. Alli fékk til liðs við sig vin sinn og kokkinn Atla Kolbein Atlason, og saman settu þeir stefnuna á 20 kg hamborgara, sem að sjálfsögðu var kolagrillaður. Er skemmst frá því að segja að útkoman varð ekkert slor. 17,545 kg af hamborgara í allri sinni dýrð:
Til að tryggja að útkoman yrði góð en ekki bara hrúga af allskonar fengu þeir félagar til liðs við sig nokkur fyrirtæki. Kjötkompaný sá þeim fyrir nautahakkinu, Gæðabakstur sá um brauðið og Weber á Íslandi lagði til auka grill, enda þurfti mikinn grillflöt fyrir allt þetta kjöt. Alli fullyrðir að þetta sé einn besti hamborgari sem hann hefur smakkað, og af þessum myndum að dæma eru það engar ýkjur!
Þeir sem vilja fylgjast með Alla á grillinu geta skannað snapchat kóðann hans hér að neðan: