Grindvíski veitingastaðurinn hjá Höllu mun opna útibú í flugstöð Leifs Eiríkssonar á næstunni, en Halla var með hagstæðasta tilboðið í veitingarekstur á annarri hæð suðurbyggingar flugstöðvarinnar, eins og fram kemur í tilkynningu frá ISAVIA.
„Gerður verður fjögurra ára samningur við Hjá Höllu um útleigu á aðstöðunni og rekstur veitingaþjónustu í suðurbyggingu flugstöðvarinnar. Mun staðurinn bjóða upp á pítsur, salöt og einn heitan rétt að auki. Stefnt er að því að staðurinn verði opnaður síðar í sumar,“ segir í tilkynningunni.
Í samtalið við Grindavík.is sagði Halla að stefnt væri að opnun í ágúst, og tók það einnig fram að Grindvíkingar þyrftu ekki að örvænta, staðurinn að Víkurbraut 62 yrði að sjálfsögðu áfram aðalstaður hjá Höllu.