Sett inn þann 26.02.03
Skipbrotsmennirnir tveir sem björguðust í dag þegar Draupnir GK sökk um 10 sjómílur suðsuðaustur af Grindavík eru feðgar. Þeir fóru báðir í sjóinn þegar báturinn sökk og komust síðan í björgunarbátinn. Báturinn Mummi GK bjargaði mönnunum, eftir að TF-LÍF þyrla Landhelgisgæslunnar hafði fundið þá á reki í björgunarbátnum, skammt frá Draupni sem maraði í kafi.
Feðgarnir, Ísleifur Haraldsson og sonur hans Gylfi Arnar, fóru á línuveiðar fyrir hádegi í gær og voru búnir að draga línuna og farnir að huga að heimleið þegar báturinn sökk skyndilega, en töluverð kvika var þegar óhappið varð.

Björgunarskip Slysavarnafélagsins Landsbjargar, Oddur V. Gíslason, er með Draupni GK í togi og er einnig með gúmmíbjörgunarbátinn innanborðs.

Áhöfn Landhelgisgæsluþyrlunnar, TF-LÍF, fann gúmmíbjörgunarbátinn með tveimur mönnum um klukkan 13.15 í dag. Báturinn Mummi GK-121 var staddur 100 metra frá gúmmíbjörgunarbátnum og fóru skipbrotsmennirnir um borð í hann. Mótorbáturinn Mummi kom til Grindavíkur með skipbrotsmennina um klukka þrjú í dag.

Draupnir er 4 tonna plastbátur, smíðaður 1977 og gerður út frá Grindavík.

fengið afmbl.is

• Síðast uppfært: 24. nóvember 2003