Sett inn þann 02.03.03
Hagnaður Þorbjarnar Fiskaness hf. á árinu 2002 nam 1.219 milljónum fyrir skatta sem er 27,3% af tekjum ársins en var 267 milljónir eða 6% af tekjum árið á undan. Hagnaður eftir skatta var 1.003 milljónir, sem er 22,5% af tekjum ársins. Er þetta langbesta afkoma félagsins til þessa en mestu munar að gengishagnaður ársins 2002 nam 730 milljónum en gengistap á árinu 2001 var 829 milljónir. Lagt verður til að greiða hluthöfum 17% arð.
Rekstrartekjur ársins voru kr. 4.466 milljónir, en voru 4.427 milljónir árið á undan. Rekstrargjöld voru 3.273 milljónir en voru 2.997 milljónir árið 2001. Hagnaður fyrir afskriftir og fjármagnsliði nam 1.193 milljónum króna sem er 26,7% af tekjum en var árið á undan 1.430 milljónir eða 32,3% af tekjum.

Í tilkynningu félagsins segir, að líkur séu á að rekstur ársins 2003 verði í þokkalegu meðallagi. Sterk staða íslensku krónunnar hafi verulega tekjulækkandi áhrif á sjávarútvegsfyrirtæki, eins og alla aðra útflutningsstarfssemi. Kostnaður við reksturinn hafi ekki lækkað að sama skapi og megi þar nefna að hráefniskostnaður landvinnslu hefur hækkað verulega. Þá hefur launakostnaður hækkað í landvinnslu. Félagið segir markaði fyrir afurðir fyrirtækisins vera í þokkalegu lagi og hafi afurðir selst jafnóðum og sé útlit fyrir að svo verði áfram.
Tilkynning Þorbjarnar Fiskaness

• Síðast uppfært: 24. nóvember 2003