Grindvíkingar komust nokkuð örugglega aftur á beinu brautina í Domino's deild karla í gær með góðum sigri á Stjörnunni í Garðabæ, 81-100. Grunnurinn að sigrinum var lagður strax í fyrsta leikhluta þar sem heimamenn skoruðu aðeins 12 stig gegn 25 stigum Grindvíkinga. Stjörnumenn héldu 2. leikhluta jöfnum en náðu aldrei að saxa á forskot gestanna.
Ólafur Ólafsson var í miklum ham í þessum leik, en hann skoraði 31 stig og setti 7 þrista í 11 tilraunum. Þá bætti hann við 8 fráköstum og tveimur stolnum boltum. Næstur í stigaskori var Dagur Kár Jónsson með 20 stig og 7 stoðsendingar og þeir Sigurður Gunnar Þorsteinsson og J'Nathan Bullock settu sitthvor 17 stigin. Sigurður bætti svo við 12 fráköstum og Bullock 9.
Með sigrinum lyftu Grindvíkingar sér upp um eitt sæti, í það 6. og einmitt upp fyrir Stjörnuna. Bæði lið eru með 20 stig en Grindavík hefur betur í innbyrðis viðureignum.
Nú er framundan landsleikjahlé í deildinni en þeir Dagur Kár og Ólafur Ólafsson eru báðir í æfingahópi landsliðsins. Næsti leikur Grindavíkur er heimaleikur gegn ÍR þann 1. mars.
Myndasafn frá leiknum í boði Karfan.is