Vefsíða Grindavíkurbæjar hefur fengið væna andlitslyftingu, en nýrri vefsíðu var hleypt af stokkunum í gær. Mikil vinna liggur að baki uppfærslunni enda eru allar stofnanir bæjarins ásamt UMFG í sama vefumhverfi, sem nú hefur verið uppfært. Sérstök áhersla var lögð á aðgengi í gegnum snjalltæki, enda kemur rúmlega helmingur af allri umferð á síðunni í gegnum síma og spjaldtölvur.
Sigurpáll Jóhannsson sá um forritun síðunnar en hönnun hennar var samvinnuverkefni Sigurpáls, Stefnu og Siggeirs F. Ævarsson, upplýsingafulltrúa Grindavíkurbæjar.
Vefteymi bæjarins leggur nú nótt við nýttan dag við að elta uppi villur og vankanta sem óumflýjanlega koma upp við svona stóra og yfirgripsmikla uppfærslu. Allar ábendingar um það sem betur má fara má senda á netfangið siggeir@grindavik.is og reynum við að bregðast hratt og örugglega við öllum ábendingum.
Einhverjir notendur sem nota ákveðnar útgáfur af Internet Explorer og Edge hafa lent í vandræðum með að nota síðuna en hún birtist ekki rétt í öllum útgáfum af þeim vöfrum. Einfaldasta lausnin á því vandamáli er að nota aðra og betri vafra, en unnið er að lausn á þessu vandamáli þannig að síðan birtist og virki rétt í öllum vöfrum.