Í gær fór fram fyrirlesturinn "Fokk me fokk you" fyrir nemendur á unglingastigi en fyrirlesturinn fjallar um sjálfsmynd unglinga, samskiptamiðla og samskipti kynjanna. Fyrirlesturinn var í boði Þrumunnar en það eru þau Kári Sigurðsson og Andrea Marel sem eiga veg og vanda að fyrirlestrinum og hafa verið að fara í grunn- menntaskóla víðsvegar um landið og ræða við unglinga um þessi mikilvægu mál.
Fyrirlesturinn skiptist í þrjá hluta. Fyrst var rætt um sjálfsmynd og hvað það er nákvæmlega sem við stjórnumst af. Hinsegin mál og mikilvægi þess að bera virðingu fyrir hvort öðru bar einnig á góma.
Í öðrum hluta var rætt um áhrif samskipta- og fjölmiðla og dæmi tekin úr netheimum. Rætt var um miðla eins og Facebook, Intagram og Snapchat og farið inn á dekkri hliðar þessara miðla en stór hluti ungs fólks notar þessa miðla daglega. Einnig var umræða um stafrænt kynferðisofbeldi og dreifingu nektarmynda.
Í síðasta hlutanum var svo fjallað um kynheilbrigði, kynlíf, klám og hvernig það síðastnefnda getur haft óheilbrigð áhrif á samskipti kynjanna. Rætt var á opinskáan hátt um mýtur og pressuna sem fylgir unlingsárunum.
Á fyrirlestrinum voru þau Kári og Andrea dugleg að styðjast við myndir, reynslusögur ungsfólks, screenshot frá ungu fólki sem og áhugaverð fræðslumyndbönd.
Eins og áður segir var fyrirlesturinn í boði Þrumunnar og fylgdust nemendur með af áhuga og tóku virkan þátt í umræðum.