Otti Sigmarsson kjörinn í stjórn Landsbjargar

• Fréttir
• 22. maí 2017

Landsþings Slysavarnarfélagsins Landsbjargar var haldið á Akureyri um helgina en þar eignuðust Grindvíkingar fulltrúa í stjórn. Otti Rafn Sigmarsson var kjörinn í níu manna stjórn félagsins og varð fjórði í kjörinu og hlaut 74% atkvæða, en alls voru 14 í framboði. Fulltrúar björgunarsveita og slysavarnardeila af öllu landinu kjósa stjórnina og er kosið til tveggja ára í senn. Alls voru um 600 félagar í Slysavarnarfélaginu Landsbjörg á Akureyri um helgina. 

Otti hefur um árabil verið öflugur liðsmaður björgunarsveitarinnar Þorbjarnar og hefur undanfarin ár verið umsjónarmaður unglingadeildarinnar Hafbjargar og þá er hann einnig varaformaður björgunarsveitarinnar. Þá má ekki gleyma því að Otti var valinn Grindavíkur ársins 2013!

Otti þakkaði fyrir sig á Facebook á laugardaginn:

Kæru vinir!

Í dag var ég kjörinn í stjórn Slysavarnafélagsins Landsbjargar til næstu tveggja ára. Það er virkilega stór og mikill áfangi í mínu lífi því núna get ég enn frekar unnið í þeim málefnum sem mér eru hugleikin. Að fá tækifæri til þess að leiða þetta 18.000 manna félag er dýrmætt en á sama tíma mikil ábyrgð og er ég ótrúlega þakklátur fyrir það traust sem mér hefur verið sýnt.

Kærar þakkir fyrir stuðninginn, ég mun ekki bregðast!

• Síðast uppfært: 22. maí 2017