Frá hausti hefur nemendum boðist að vera í ávaxtaáskrift á morgnana. Er þá um að ræða niðurskorna ávexti og grænmeti. Skráning í áskrift og greiðsla fer fram í gegnum Skólamat ehf en starfsfólk innan skólans sér um að skera ávextina og koma þeim fyrir á huggulegum bökkum sem nemendur sjá svo um að fara með inn í bekkina. Mánaðartímabil kostar 2200 kr. fyrir hvern nemanda. Sumir nemendur koma t.d. með brauðsneið að heiman sem nesti en eru jafnframt í ávaxtaáskrift.
Stefna skólans er að stuðla að því að nemendur borði holla og næringarríka fæðu en svo má bæta því við að skólinn starfar undir merkjum grænfána sem felur m.a. í sér að minnka sem mest umbúðir. Margir nemendur hafa nú þegar verið í áskrift en alltaf má bæta við áskrifendum. Líklegt er að margir prófi að smakka fleiri tegundir af hollum ávöxtum og grænmeti ef þeir eru í áskrift og þannig virki áskriftin sem hvatning til að þróa matarsmekk nemenda.