Ungmennagarðurinn sem Ungmennaráð Grindavíkur hefur skipulagt austast á skólalóð grunnskólans við Ásabraut er sífellt að taka á sig betri mynd. Í sumar var strandblakvöllur tekinn í gegn sem hefur slegið í gegn. Í fyrra var aparóla, grillskýli og útigrill sett í garðinn og nýjasta viðbótin er kósýróla (sófaróla) sem er gríðar vinsæl. Allt þetta nýtist ekki bara ungmennum heldur einnig nemendum grunnskólans og auðvitað almenningi. Jón Axel Guðmundsson leikmaður Grindavíkurliðsins í körfubolta sagði einnig frá því í viðtali í Fréttablaðinu fyrir skömmu að körfuboltaleikmenn Grindavíkur hefðu verið duglegir að nota strandblakvöllinn í sumar til að halda sér í æfingu. Þá er Grunnskóli Grindavíkur líklega eini grunnskóli landsins sem býr við þann lúxus að hafa strandblakvöll á skólalóðinni.
Bæjarstjórn Grindavíkur veitti fjárheimild í þessi verkefni og hefur Ungmennaráð Grindavíkur sýnt að það er traustsins vert. Það teiknaði sjálft upp skipulagið að Ungmennagarðinum (eins og sjá má á grunnhugmyndinni að neðan frá 2014) og hefur unnið að uppbyggingu hans. Tvennt er eftir og það er annars vegar minigolf og hins vegar trampólínkörfuboltavöllur en það er háð frekari fjárveitingum bæjarstjórnar. Til að koma trampólínkörfuboltavelli fyrir þarf að fjarlægja a.m.k. aðra útistofuna sem er á lóðinni.
Félagsmiðstöðin Þruman er með aðstöðu austast í Grunnskóla Grindavíkur eða alveg við Ungmennagarðinn og því vinnur þetta svæði allt vel saman. Ungmennagarðurinn er afsprengi hugmynda- og undirbúningsvinnu Ungmennaráðs Grindavíkurbæjar.