Með hjálm á hjólabretti

• Fréttir
• 8. apríl 2016

Á skólalóð Hópsskóla hefur  verið lokið við að setja upp hjólabrettapalla, samkvæmt upphaflegu skipulagi skólalóðar. Pallar þessir eru frábær viðbót við aðra leikaðstöðu á lóðinni og hafa nemendur verið áhugasamir um þessar framkvæmdir.
Ármann Halldórsson faðir eins nemenda við skólann en jafnframt sviðsstjóri skipulags- og umhverfissviðs Grindavíkurbæjar, leit við í einum frímínútum og sýndi nemendum undirstöðuatriðin þegar verið er á bretti.  

Fórst honum það vel úr hendi enda þaulreyndur á hjólabretti. Lagði hann ríka áherslu á að nemendur gættu sín ávallt á því að vera með hjálm þegar leikið væri á hjólabrettapöllunum. Margir nemendur fengu að prófa að fara eina ferð og þótti þeim það voða spennandi.   Ármann tók vel í það að mæta aftur og leiðbeina enn frekar en jafnframt benti hann á að hægt væri að fara á námskeið hjá Brettafélagi Hafnarfjarðar.

• Síðast uppfært: 8. apríl 2016