Grindvíkingurinn og rithöfundurinn Guðbergur Bergsson hefur verið tilnefndur til Bókmenntaverðlauna Norðurlandaráðs fyrir nýjustu bók sína, Þrír snéru aftur. Þetta er í fimmta sinn sem Guðbergur er tilnefndur til verðlaunanna en tilkynnt verður um vinningshafa þann 1. nóvember næstkomandi í tónleikahúsi DR í Kaupmannahöfn.
Eins og flestum er kunnugt um er Guðbergur fæddur og uppalinn hér í Grindavík en hann árið 2012 var útnefndur heiðursborgari Grindavíkur. Hægt er að fylgjast með ævintýrum Guðbergs á Facebook síðunni „Guðbergur Bergsson - Guðbergsstofa" en téð stofa er staðsett í Kvikunni, menningarhúsi okkar Grindvíkinga.