Vel tekið í hugmyndir um skrautfiskasafn og íslistasafn

• Fréttir
• 16. mars 2009

Eins og greint hefur verið frá á heimasíðunni hafa ýmis skemmtileg erindi komið inn á borð bæjarins að undanförnu frá einkaaðilum í þeim tilgangi að skapa atvinnu og fá fleiri ferðamenn til bæjarins. Tvö þessara erinda voru tekin fyrir hjá  atvinnu- og ferðamálanefnd bæjarins á dögunum.

Guðmundur J. Sigurgeirsson mætti á fund nefndarinnar og hélt áhugaverða kynningu á skrautfiskum. Ljóst er að þarna fer maður sem hefur viðað að sér mikilli þekkingu á skrautsfiskum að því er segir í fundargerð. Guðmundur á mikið safn skrautfiska sem þurfa mikið pláss. Honum sárvantar stað undir safnið sitt því fiskarnir og búrin eru í geymslu á ýmsum stöðum. Gólfflöturinn undir safnið þarf að vera að lágmarki 160 fermetrar en hann hugsar sér þetta sem einskonar safn og verslun fyrir gæludýraeigendur. Ef vel tekst til gæti þetta verið aðdráttarafl t.d. fyrir skóla og ferðamenn. Nefndin leggur til að Guðmundur auglýsi eftir húsnæði og taki saman rekstraráætlun sem verður svo tekin fyrir á fundi atvinnu - og ferðamálanefndar með hliðsjón af nýjum reglum bæjarins um aðkomu Grindavíkurbæjar að atvinnuuppbyggingu.

Óttó Magnússon og Milen Nikolov kynntu svo fyrir nefndinni hugmyndir sínar um íslistasafn. Nefndinni lýst vel á þessar hugmyndir og leggur til að  frekari upplýsingum verði safnað varðandi kostnað, staðarval og hugsanlega aðkomu Grindavíkurbæjar að verkefninu.

• Síðast uppfært: 16. mars 2009