Tónlistarskólinn í Grindavík - skólaárið 2014-2015 yfirlit

• Fréttir
• 13. júní 2015

Nú er að baki vetur sem hefur bæði verið mjög spennandi og afar lærdómsríkur. Tónlistarskólinn flutti í þetta nýja og glæsilega húsnæði í haust og var það formlega vígt 16. október sl. og hefur gjörbylt allri starfsaðstöðu bæði nemenda og kennara.

Í vetur bauð tónlistarskólinn upp á einkakennslu á fiðlu, klarínett, klassískan gítar, píanó, rafbassa, rafgítar, söng, trommur, trompet, horn og þverflautu. Einnig var boðið upp á hóptíma í fræðigreinum fyrir alla nemendur skólans ásamt opnum tímum í tónlist og tölvum í tölvuveri skólans. 

Í samstarfi við Grunnskólann var eins og áður öllum 6, 7 og 8 ára börnum boðið upp á forskólakennslu en fer sú kennsla nú fram í húsnæði Hópskóla. Kennsla 5. bekkja í hljóðfæranámi hélt líka áfram. Sú kennsla fór fram í 2 - 3 manna hópum þar sem að hálfur bekkur kom í tónlistarskólann í senn og skiptist þar niður á þau hljóðfæri sem að þau höfðu valið. Þessari hljóðfærakennslu er skipt niður á þrjár annir þannig að eftir veturinn hafa nemendurnir fengið að prófa 3 mismunandi hljóðfæri. Einnig var Tónlist og tölvur kennd sem valgrein í 7. - 10. bekkjum grunnskólans.

Þann 21. október skall svo á verkfall félags tónlistarskólakennara sem stóð í nærfellt fimm vikur eða til 25. nóvember og setti það mark sitt á haustönnina. Þrátt fyrir það kom tónlistarskólinn víða við í vetur. Nemendur komu t.a.m. fram á opnunarhátíð Iðunnar, á þrettándanum og í friðargöngu. Jólatónleikum skólans í Grindavíkurkirkju var aflýst og þess í stað haldnir tvennir tónleikar og "litlu jól" á sal tónlistarskólans sem féll í góðan jarðveg.

Þann 16. febrúar héldum við upp á dag tónlistarskólanna með opnu húsi frá kl. 10:00 - 13:00 og voru nemendur með uppákomur á heila og hálfa tímanum heitt var á könnunni djús og kex. Þetta var lærdómsríkt og skemmtilegt og við eigum eflaust eftir að prófa fleiri útfærslur á opnu húsi í framtíðinni.

Nemendur tónlistarskólans spiluðu við opnun menningarviku þann 14. mars sl. og var skólinn einnig með tónleika í tilefni þeirrar viku.

Tónlistarskólinn sendi verðugan fulltrúa sinn til að spila á stóru upplestrarkeppninni sem haldin var í mars í Vogunum. Einnig spiluðu nemendur í æskulýðsmessu, á samkomu eldri borgara í Eldborg og á samkomu Lions í nýjum sal íþróttamannvirkisins.

Fastir liðir skólans voru á sínum stað eins og mánaðarlegir tónfundir, tvennir jólatónleikar og nú síðast þrennir vortónleikar. Einnig komu nemendur fram á vorgleðinni, og skólaslitum Grunnskólans í júní.

Leikskólarnir heimsóttu tónlistarskólann eins og undanfarin ár. Í þeim heimsóknum fá börnin að prófa öll hljóðfæri skólans og hlýða á nemendur tónlistarskólans spila fyrir þau á ýmis hljóðfæri. Þetta eru einstaklega ánægjulegar heimsóknir. Fulltrúi tónlistarskólans heimsótti einnig Leikskólann Krók í menningarvikunni.

Um áramót hófst innleiðing nýrrar kennsluaðferðar, Eftirfylgniaðferðin sem er aðlöguð og útfærð aðferð úr speglaðri kennslu sem ætluð er til að styðja nemandann í heimanámi í fræðigreinum og við hljóðfæraæfingar. Kennarar skólans eru komnir mislangt í þessari innleiðingu en stefnt er að því að þessi aðferð verði orðinn fastur hluti af kennslunni þegar að innleiðingarferlinu lýkur um næstu áramót.

Kær kveðja og gleðilegt sumar, 

Inga Þórðardóttir

• Síðast uppfært: 13. júní 2015