Föstudagskvöldið 8. maí síðastliðinn fékk Slökkvilið Grindavíkur tilkynningu um að eldur væri kviknaður í sinu ofan á Þorbirni. Það var ekki hlaupið að því að koma slökkviliðsmönnum og tækjum á staðinn en í samvinnu við björgunarsveitina voru sjö slökkviliðsmenn ferjaðir upp ásamt búnaði. Slökkvistarf tók rúma tvo tíma og tókst slökkviliðinu ágætlega að hefta útbreiðslu eldsins.
Meðfylgjandi mynd var tekin miðvikudaginn 27. maí. Eins og sjá má er svæðið nokkuð illa farið en ljóst að ef slökkviliðsins hefði ekki notið við væri lautin efst á Þorbirni sennilega öll kolsvört eins og hún leggur sig. Nú verður svo tíminn og tíðarfarið í sumar að leiða í ljós hversu hratt svæðið jafnar sig.