Framkvæmdir við nýtt 5 stjörnu lúxushótel Bláa lónsins eru nú komnar á fullt skrið en stefnt er að opnun hótelsins vorið 2017. Alls verða 60 herbergi á hótelinu og mannvirki Bláa lónsins tvöfaldast að stærð við þessar framkvæmdir. Nánar má lesa um umfang verkefnisins á vef Víkurfrétta.
Að baki jafn stórri framkvæmd og þessari liggja að sjálfsögðu fjölmargar teikningar en fulltrúi Bláa lónsins skilaði þeim inn á skrifstofu byggingarfulltrúa Grindavíkurbæjar, Sigmars Árnasonar, í dag. Nú bíður hans ærið verkefni að fara yfir allar teikningarnar, skanna þær og skrá til varðveislu hjá Grindavíkurbæ.
Byggingarfulltrúa til varnar er vert að taka fram að teikningarnar á myndinni eru í tvíriti, en heildarmagnið fyrir framkvæmdina er þó meira því teikningar fyrir innréttingar vantar.