Gamlir neyðarsendar hætta að virka

• Fréttir
• 31. janúar 2009

Skipstjórnarmenn í Grindavík og um allt land eru hvattir til að athuga að 1. febrúar hættir svokallað Cospas-Sarsat gervihnattakerfi að hlusta eftir merkjum úr gömlum neyðarsendum skipa, báta og smærri flugvéla. Einungis verður hlustað eftir merkjum úr nýrri neyðarsendum sem nota tíðnina 406 MHz.

Í tilkynningu frá Landhelgisgæslunni kemur fram að mikilvægt sé að yfirfara og skipta út gömlum neyðarsendum. Nýju sendarnir styðjist við GPS staðsetningarkerfið og því verði leitarsvæðið minna eða einungis 60 til 100 metrar í radíus. Áríðandi sé að nýir sendar verði settir sem fyrst í alla báta ekki síst björgunarbáta.

Fyrirtækið Copas-Sarsat ákvað að leggja niður gamla kerfið í samráði við Alþjóða flugmálastofnunina og Alþjóða siglingamálastofnunina. Hægt verður að fækka óþarfa útköllum með nýja neyðarsendakerfinu.

• Síðast uppfært: 31. janúar 2009