Fjórða og síðasta tölublað Járngerðar ársins 2014 kemur út í dag og verður dreift í öll hús. Reyndar gæti dreifingin teygt sig fram yfir helgi. Blaðið er stútfullt af áhugaverðu, fræðandi og skemmtilegu efni um starfsemi Grindavíkurbæjar, stofnana hans auk ýmislegs annars. Blaðið er einnig hægt að nálgast hér (PDF).
Á meðal efnis er sagt frá gerð deiliskipulags fyrir gamla bæinn og höfnina, viðtal við Kjartan Már Hallkelsson framkvæmdastjóra Gym heilsu ehf um nýja líkamsræktaraðstöðu sem verður í sundlaugarhúsinu, sagt frá fallegri aðkomu að nýrri íþróttamiðstöð og frá fjárhagsáætlun 2015. Jafnframt er sagt frá félagsmiðstöðinni Þrumunni sem ætlar að bæta í starfsemi sína með því að opna frístundaklúbb fyrir 3.-4. bekk og opna aðstöðuna fyrir framhaldsskólanemendur. Einnig er sagt frá stefnumótun um frístundastarf, starfsemi grunnskólans, bókasafns og Lautar, frá fjörugu afmælisári, nýrri umferðaröryggisáætlun, Foreldrafærni, fjölgun gistirýma í bænum og nýjum körfubíl slökkviliðsins, svo eitthvað sé nefnt.
Forsíðumynd Járngerðar tók Arnfinnur Antonsson, starfsmaður hafnarinnar.
Ritstjóri Járngerðar er Þorsteinn Gunnarsson, sviðsstjóri frístunda- og menningarsviðs. Blaðamaður og ljósmyndari er Siggeir Fannar Ævarsson upplýsinga- og skjalafulltrúi.