Mikil aukning hefur verið í útflutningi að undanförnu hjá Íslandsbleikju sem Samherji rekur á Stað í Grindavík og er svo komið að Íslandsbleikja er með stærri vinnustöðum í Grindavík. Í vinnslusalnum einum vinna 22,  allt starfsfólk sem búsett er í Grindavík.

Íslandsbleikja er reyndar stærsti framleiðandi bleikju í heimi. Íslandsbleikja sérhæfir sig í framleiðslu á bleikju, allt frá hrognum og til fullunninna flaka. Afar fullkomin vinnsla er fyrir bleikjuafurðir í Grindavík. Framleiðslugeta er 3.000 tonn af bleikju í 50.000 rúmmetra eldisrými.

Að sögn Bergþóru Gísladóttur, vinnslustjóra hjá Íslandsbleikju, stefnir í að um 220-230 tonnum af bleikju verði slátrað í janúar.

,,Óhætt er að segja að botnlaus vinna hafi verið hjá okkur í janúar og er alltaf að aukast. Starfsmannafjöldinn hefur aukist jafnt og þétt síðan við byrjuðum fyrir einu og hálfu ári. Nú síðast bættust tveir starfsmenn við í janúar og gæti farið svo  að fleira fólk yrði ráðið  næstunni. Við vorum áður fyrr með laxavinnslu á Þórkötlustöðum en erum hætt því og höfum snúið okkur alfarið að bleikjunni með góðum árangri. Söludeildin okkar hefur náð frábærum árangri og erum við að nálgast þau markmið sem við settum okkur í framleiðslu og sölumálum," segir Bergþóra.

Bleikjan er send fersk beint í flug, aðallega til Bandaríkjanna en einnig til Evrópu. Fyrir skömmu gerði Íslandsbleikja samning við stóra verslunarkeðju í Bandaríkjunum sem er með um 270 verslanir á sínum snærum.

Bergþóra segir að bleikjan sé gæða fiskur og virkilega bragðgóður.