Vel heppnaður fundur um skólastefnu Grindavíkur

• Fréttir
• 17. janúar 2009

Formleg vinna við skólastefnu Grindavíkur hófst með skólaþingi í dag í Grunnskóla Grindavíkur. Góð mæting var á fundinn þar sem bæjarbúum gafst kostur á að hafa áhrif á mótun skólastefnu sveitarfélagsins en þetta er gert samkvæmt nýjum grunnskólalögum.

Jón Fannar Guðmundsson opnaði fundinn en inngang flutti Ólafur Jóhannsson, frá Kennaraháskóla Íslands, sem er bænum til ráðgjafar. Erindi hans var afar áhugavert þar sem hann hvatti Grindvíkinga til víðtækrar samstöðu um skólastefnu.

Síðan var skipt í fjóra hópa þar sem fundargestum gafst kostur á að koma með hugmyndir að framtíðarsýn okkar í skóla- og æskulýðsmálum. Hóparnir skiptust í málefni grunnskóla, leikskóla, tónlistarskóla og æskulýðs- og tómstundarmál. Þar komu ýmsar áhugaverðar hugmyndir fram.

Boðið var upp á súpu og brauð og síðan hélt hópastarfið áfram.

Áfram verður unnið í framtíðarsýn skóla- og æskulýðsmála bæjarins á næstu mánuðuðum og sér átta manna stýrihópur um verkefnið. Gert er ráð fyrir að endanlegar niðurstöður verði kynntar í haust. Bæjarbúar geta áfram komið skoðunum sínum á framfæri með því að skrá athugasemdir eða hugmyndir og senda á netfangið skolastefna@grindavik.is.

Myndin var tekin á ráðstefunni í dag af hluta hópsins sem fjallaði um skólamál.

• Síðast uppfært: 17. janúar 2009