Heilbrigðiseftirlit Suðurnesja birti nýlega opinberlega mælingar sínar á saurgerlamengun í sjó við Reykjanes og er skemmst frá því að segja að sjórinn hér við Grindavík mælist nær undantekningalaust ótrúlega hreinn og oftar en ekki mældist hreinlega engin saurgerlamengun í sjónum.
Þetta eru auðvitað frábærar fréttir fyrir okkur Grindvíkinga og vonandi höldum við áfram á sömu braut þrátt fyrir ört vaxandi umsvif við höfnina og stækkandi byggð. Þá eru þetta ekki síður góðar fréttir fyrir þann mikla fjölda iðkenda sjóíþrótta sem sækja hingað í auknum mæli til að skella sér á bretti í öldunum hér við Bótina.
Mælingar hér við Grindavík eru gerðar á tveimur stöðum, við Litlubót annars vegar og við Hópsnesið hins vegar. Eins og sjá má á heimasíðu HES koma báðir staðir mjög vel út og eru nær undantekningalaust í lægsta mengunarflokki.