Sett inn þann 14.10.03
Ef til línuívilnunar kemur hafa bátar í Grindavík mesta möguleika af öllum útgerðarstöðum landsins til að nýta sér hana í þorski. Tæp 7% af úthlutuðum þorskkvóta á smábáta og krókaaflamarksbáta koma í hlut Grindavíkur. Vestfirðir eru hæsti landshlutinn en Reykjanes ásamt höfuðborgarsvæðinu kemur næst á eftir. Í umræðum um línuívilnun hefur hins vegar jafnvel mátt skilja að hún yrði eingöngu bundin við Vestfirði. Þar er skemmst að minnast viðtals við formann Útvegsmannafélags Suðurnesja, Þorsteins Erlingssonar, um framgöngu Vestfirðinga í máli þessu.

Með línuívilnun er átt við að veita dagróðrabátum, sem róa með línu, ívilnun í kvóta. Þeir bátar sem helst er rætt um að hafi möguleika á að nýta sér þennan möguleika eru smábátar og svokallaðir krókaaflamarksbátar.

Eðli málsins samkvæmt hafa mesta möguleika til þess að nýta sér ívilnun þessa þeir bátar sem mesta úthlutun hafa í hverri tegund fyrir sig sem veiðist á línu. Mest hefur í umræðunni borið á hugsanlegum veiðum á þorski á línu.

Við skoðun á úthlutuðum aflakvóta í þorski til þessara bátaflokka kemur margt athyglisvert í ljós. Bátar í Grindavík, sem er á félagssvæði Útvegsmannafélags Suðurnesja, geta borið mest úr býtum ef til línuívilnunar kemur. Bátar í Grindavík hafa til umráða tæp 7% af þorskkvóta í þessum bátaflokkum. Er það stærsta úthlutun til einstaks sveitarfélags á landinu. Næst á eftir kemur Bolungarvík með 5,3%, síðan Grímsey með 4,6%, Hornafjörður með 4,6% og fimmta sveitarfélagið í röðinni er Ólafsvík með 4,5% aflaheimilda í þorski á þessa tegund báta. Af öðrum sveitarfélögum má nefna að sjálf höfuðborgin, sem aldrei er nefnd sem smábátaútgerðarstaður, er með 3,9% kvótans og Hafnarfjörður þar rétt ofar með 4,0% úthlutunar.

Þegar horft er til landshluta kemur mest í hlut Vestfirðinga eða 25,7%, Reykjanes ásamt höfuðborgarsvæðinu kemur þar á eftir með 21,0%, Vesturland með 17,6%, Austurland með 16,7% og Norðurland með 16,5%. Lestina rekur Suðurland með 2,5% af heildarúthlutun í þorski.

Af þessum tölum má ráða að svokölluð línuívilnun gæti vegið þungt í flestum landshlutum ef til hennar kemur. Það skal ítrekað að hér er aðeins verið að fjalla um hlutfall úthlutunar í þorski til tveggja flokka skipa. Ekki er sjálfgefið að menn nýti sér þá möguleika sem í boði eru. Hins vegar er kvótaeign forsenda þess að ívilnun komi til.

fengið af bb.is

• Síðast uppfært: 24. nóvember 2003