Mikill mannfjöldi í Þórkötlustaðarétt

• Fréttir
• 23. september 2008

Mikill mannfjöldi lagði leið sína að  Þórkötlustaðaréttum s.l. laugardag. Um 1200 kindur voru dregnar í dilka og fjárglöggir menn töldu að annað eins hefði verið af mannfólki. Börn og fullorðnir skemmtu sér vel þrátt fyrir rigningu af og til. Þá var gott að geta stungið sér inn í hlýjuna í garðskálanum í Auðsholti og gætt sér á dýrindis kjötsúpu. Eiga allir þeir sem komu að súpugerð bestu þakkir skyldar. Sömuleiðis hjónin í Stafholti sem buðu aðstöðu fyrir haustmarkaðinn. Ýmislegt var í boði sultur, krem, handverk o.m.fl. Margir tóku þátt í ratleiknum og svöruðu spurningum um sauðkindina. Vinningshafar voru dregnir út og fengu að sjálfsögðu ullarvörur hannaða af Krístínu Valdimarsdóttur, prjónakonu í Grindavík.
Vinningshafar: Bjarni Ólason, Grindavík, Viðar Kjartansson, Grindavík og Guðjón Jónsson, Kópavogi. Þátttakendur sem og aðrir gestir eiga bestu þakkir skyldar fyrir góðan réttardag.

• Síðast uppfært: 23. september 2008