Dósasöfnun vekur athygli

• Fréttir
• 6. janúar 2009

Morgunblaðið fjallar um dósasöfnun meistaraflokks karla- og kvenna í körfubolta í íþróttakálfi sínum í dag og er jafnframt vitnað í greinina á baksíðu blaðsins. Þar er m.a. viðtal við Pál Axel Vilbergsson, fyrirliða Grindavíkur.

Í grein Morgunblaðsins segir m.a.:

,,FJÁRÖFLUN af ýmsum gerðum er einkenni á starfi íþróttafélaga um allt land. Meistaraflokksleikmenn körfuknattleiksdeildar Grindavíkur í karla- og kvennaflokki hafa á síðustu árum hafið árið með ?hópefli" þar sem stjórnir og leikmenn beggja liða ganga í hús í Grindavík og safna dósum. Landsliðsmaðurinn Páll Axel Vilbergsson segir að þessi söfnun hafi ávallt þjappað hópnum saman og það sé ekkert nýtt fyrir leikmenn meistaraflokks karla að taka þátt í fjáröflun félagsins.

?Ég hef bara gaman af þessu og við komum að öllum fjáröflunum sem tengjast meistaraflokki karla með einum eða öðrum hætti. Reyndar líður mér betur þegar ég spila fyrir fullu húsi af áhorfendum en þegar ég banka upp á hjá fólki og óska eftir dósunum þeirra eftir jólahátíðina. Það er smá feimni í gangi hjá mér og eflaust hjá fleiri leikmönnum. Bæjarbúar taka alltaf vel á móti okkur og þessi söfnun er fínt hópefli fyrir okkur í deildinni." Fyrirliði Grindavíkur segir að dósasöfnunin hafi gengið það vel að menn hafi látið sér detta það í hug að fara í nágrannasveitarfélögin og láta á það reyna hvernig það myndi ganga. ?Jú, menn hafa sagt það í okkar hópi að það væri bara fyndið að fara í Keflavík eða Njarðvík og banka upp á og óska eftir dósum. Ég veit ekki hvernig tekið yrði á móti okkur en ég efast um að þetta verði sett í framkvæmd."