Stóra upplestrarkeppnin hefst á degi íslenskrar tungu, 16. nóvember, og henni lýkur með lokahátíð þar sem nemendur spreyta sig á upplestri verka eftir íslenska höfunda.
Að þessu sinni var lokahátíðin haldin í Grunnskólanum í Grindavík. Þangað mættu nemendur úr Grunnskólanum hér, Stóru-Vogaskóla í Vogum og Gerðaskóla Garði. Vandað er til lokahátíðarinnar og var boðið upp á tónlistaratriði á milli lesturs.
Þórdís Steinþórsdóttir frá Tónlistarskóla Grindavíkur lék á klarinett og naut aðstoðar Frank Herlufsen í verkinu O solemio. Eva Rós Jónsdóttir frá Gerðaskóla lék á píanó verkið Snowflake Rag og Einar Hugi Böðvarsson frá Stóru-Vogaskóla lék á píanó lagið Chorale. Gott framlag frá skólunum.
Skáld keppninnar að þessu sinni voru þau Erla (Guðfinna Þorsteinsdóttir) og Þorgrímur Þráinsson. Dómarar voru þau Jón Hjartarson, Guðbjörg M. Sveinsdóttir Jóni Ingi Baldvinsson og Lilja Dögg Friðriksdóttir. Stóra upplestrarkeppnin nýtur velvildar ýmissa aðila og að þessu sinni eru styrktaraðilarnir Raddir, samtök um vandaðan upplestur og framsögn, Íslandsbanki, Félag bókaútgefenda og Mjólkursamsalan.
12 keppendur, 4 frá hverjum skóla, skiptust á upplestrinum sem var í 1. umferð texti úr verkum Þorgríms Þráinssonar, síðan var lesið ljóð eftir Erlu og í lokaumferðinni var sjálfvalið ljóð. Eftir störf dómara sem var vandasamt var það niðurstaða þeirra að 3. sætið hlyti Alexander Franzson frá Gerðaskóla, 2. sætið félli í skaut Sigurdísar Unnar Ingudóttur og í 1. sæti var Óskar Nikulás Sveinbjarnarson. Glæsileg lok á glæsilegri lokahátíð.