Jóga úti í náttúrunni. Sveppatínsla. Plöntuskoðun. Þetta er m.a. viðfangsefni í smiðju í 2. bekk hjá Halldóru Halldórsdóttur kennara og kundalini jógakennara. Í haust hefur hún farið út í náttúruna með sinn hóp ásamt Helgu Eysteinsdóttur stuðningsfulltrúa. Kúadalur er svæðið þeirra og þar má einnig finna alls kyns jurtir sem vaxa í hrauninu og gá að sveppum og berjum.
Vaxandi áhugi er fyrir því í skólanum að vera með útikennslu en þannig kennsla getur stuðlað að góðri tengingu við nærumhverfið og boðið upp á margvísleg nýstárleg verkefni sem ekki verða til inni skólastofunni. Þá fá börnin útrás fyrir hreyfingu og gott loft í kroppinn sinn svo er gott að lauma smátt og smátt inn jógaæfingum. Eins og sjá má á myndunum njóta börnin kennslustundarinnar úti í guðs grænni náttúrunni.