Á dögunum var Björgunarsveitin Þorbjörn frá Grindavík kölluð út vegna bíls sem sat fastur í skafli á Suðurstrandarveginum. Þetta þykir alls ekki óvenjulegt á þessum árstíma og var því farið á einum bíl, fólkinu til aðstoðar, að því er segir á vef sveitarinnar. Þegar búið var að losa bílinn og verið var að ganga frá spottum, kom ungur maður fótgangandi úr austri, í strigaskóm, gallabuxum og léttum vindjakka. Hann kvaðst hafa fest bíl sinn snemma í morgun eða seint í nótt.
Maðurinn ásamt tveimur öðrum gistu í bílnum þangað til að það birti en þá ákvað hann að ganga af stað í leit að hjálp. Hann hafði svo gengið í úrhellis rigningu tæplega 5 kílómetra leið þegar hann rakst á björgunarsveitarmennina sem annars hefðu farið til baka til Grindavíkur. Þá átti maðurinn eftir um 12 km göngu til Grindavíkur.
Sem betur fer var nokkuð milt veður þó að það hafi ringt svolítið en ekki hefði þurft að spyrja að leikslokum ef veðrið hefði eitthvað breyst. Maðurinn, sem var bæði blautur og kaldur, var því feginn að komast inn í heitan bílinn. Bílinn hans var svo losaður og komst hann farsællega til byggða ásamt ferðafélögum sínum eftir kaldan morgun við suðurströndina.