Á liðnum dögum hafa birst fréttir og greiningar á fjárhagslegri stöðu sveitarfélaga á Íslandi og skattheimtu þeirra. Skemmst er að minnast þess að Viðskiptablaðið greindi frá því að Grindavíkurbær er í hópi 9 sveitarfélaga sem leggja ekki á hámarksútsvar, en bæjarstjórn samþykkti að lækka útsvarshlutfallið úr 14,48% í 14,28% á árinu 2013.
Á fundi bæjarráðs í gær var fjallað um skýrslu greiningardeildar Arion banka frá júní 2013 Sveitarfélögin 2012.
Í skýrslunni er að finna samanburð á fjárhagslegum upplýsingum um 28 fjölmennustu sveitarfélaga landsins. Í skýrslunni kemur fram að fjárhagsleg staða Grindavíkurbæjar er mjög góð, sérstaklega eigna og skuldastaða. Greiningardeild Arion banka metur Grindavíkurbæ með sterkasta fjárhagslega stöðu 28 fjölmennustu sveitarfélaga á Íslandi.
Á sama fundi var fjallað um samanburð Byggðastofnunar á fasteignagjöldum 27 sveitarfélaga. Sveitarfélögin eru þverskurður þéttbýlissveitarfélaga á Íslandi. Samanburðurinn byggir á vísitöluhúsi sem er einbýlishús, byggt 1975. Húsið er 161,1 m2 að stærð, 808 m2 lóð og staðsett í þéttbýli.
Samanburðurinn leiðir í ljós að fasteignagjöld á íbúðarhúsnæði í Grindavíkurbæ eru þau sjöttu lægstu í hópi þessara 27 sveitarfélaga.