Grænfáninn afhentur Króki í þriðja sinn

• Fréttir
• 21. júní 2013

Þann 19. júní síðastliðinn fékk heilsuleikskólinn Krókur afhentan Grænfánann í þriðja sinn. Gerður Magnúsdóttir frá Landvernd kom og afhenti fánann og veitti alþjóðlega viðurkenningu fyrir góða frammistöðu í menntun til sjálfbærrar þróunar og fyrir að leggja sitt af mörkum til þess að efla og bæta umhverfismál innan skólans og í nærsamfélaginu.

,,Með umhverfisstefnunni okkar viljum við sýna gott fordæmi og kenna börnunum að þau geta haft jákvæð áhrif á umhverfi sitt. Þannig munum við hafa áhrif á að komandi kynslóðir læri að umgangast náttúruna af virðingu. Mikilvægt er að börn upplifi náttúruna af eigin raun og læri að njóta hennar sér til yndisauka. Í leikskólanum er stuðlað að virðingu barnanna fyrir náttúrunni og náttúruvernd og þeim séð fyrir fjölbreyttum möguleikum á að kynnast henni, veðrinu og árstíðunum í fjölbreytileika sínum. Eftir að Grænfánanum var flaggað gengum við fylktu liði í kyrrðardalinn okkar þar sem var sungið, gerðar teygjuæfingar og fengið sér hressingu. Þökkum við foreldrafélaginu fyrir aðstoðina sem og foreldrum og öðrum gestum fyrir að koma og taka þátt í hátíðarhöldunum með okku," sagði Hulda Jóhannsdóttir leikskólastjóri.

• Síðast uppfært: 21. júní 2013