Fasteignamat hækkar mest í Strandabyggð og í Vestmannaeyjum. Á sama tíma er lækkun í
Reykjanesbæ og Grindavík. Á höfuðborgarsvæðinu er mest hækkun á Arnarnesi og í Norðlingaholti.
Nýtt fasteignamat Þjóðskrár Íslands fyrir næsta ár var kynnt í dag en það endurspeglar markaðsverðmæti
og byggir á tugþúsundum þinglýstra kaupsamninga. Heildarmat fasteigna hækkaði um 4,3%.
Strandabyggð var langt yfir landsmeðaltalinu en þar hækkaði fasteignamatið um 16,3%. Næst á eftir voru
Vestmannaeyjar með hækkun upp á 10,1%. Í Reykjanesbæ og Grindavík lækkaði fasteignamatið
um 0,6 og 0,3%. Á höfuðborgarsvæðinu var hækkunin mest á Arnarnesi, eða 13,8% og í
Norðlingaholti þar sem hún var 12,8%. Mest var lækkunin í Seláshverfi, eða 2,5% og 3,2% í Blesugróf.
Sé horft til landshluta kemur í ljós að fasteignamatið á Suðurnesjum stendur í stað. Á Vesturlandi er
hækkunin í takt við heildarmat landsins, eða 4,2%. Á Vestfjörðum er hækkunin 5,4%, 2,5% á Norðurlandi
vestra, 5,7% á Norðurlandi eystra , 4,8% á Austurlandi en mest er hækkunin á Suðurlandi, 5,8%.
Samhliða nýju fasteignamati var þróun leiguverðs kynnt. Leiguverð á höfuðborgarsvæðinu hefur
hækkað meira en kaupverð frá ársbyrjun 2011. Þar munar 5,5 prósentustigi. Hærra fasteignamat þýðir ekki aðeins hærra söluvirði, heldur er það einnig undirstaða fasteignaskatta. Flest sveitarfélög nota
fasteignamat til að ákveða gjöld sem snúa að vatnsveitu, sorphirðu, fráveitu og lóðaleigu. Ef
fasteignamat hækkar og álagningarhlutfall sveitarfélags helst óbreytt þýðir það hærri gjöld fyrir
fasteignaeigendur en ákvörðun er tekin um álagninguna einu sinni á ári. (ruv.is).