Nú er unnið að stefnumótun fyrir Grindavíkurhöfn. Markmið er tvíþætt. Annars vegar að greina stöðu Grindavíkurhafnar í samkeppnisumhverfi sínu. Hins vegar að koma með tillögur að stefnumótun og sóknaráætlun fyrir Grindavíkurhöfn.
Sigurður A. Kristmundsson hafnarstjóri átti hugmyndina að því að fá ýmsa hagsmunaaðila til að setjast niður og ræða stöðu hafnarinnar og horfa til framtíðar. Þorsteinn Gunnarsson, upplýsinga- og þróunarfulltrúi Grindavíkurbæjar og nemi í MPM við HR, tók að sér verkefnastjórn og nýtti tæki og tól í náminu til þess að stýra vinnunni á grundvelli stefnumótunarfærni.
Í hagsmunaaðilahópnum voru: Sigurður A. Kristmundsson hafnarstjóri, Róbert Ragnarsson bæjarstjóri, Sigurður Jónsson skipstjóri, Pétur Már Benediktsson hjá Vélsmiðju Grindavíkur, Andrés Óskarsson útgerðarstjóri í Vísi hf. og Andrés Guðmundsson útgerðarstjóri hjá Þorbirni hf. Hópurinn hefur skilað af sér skýrslunni til hafnarstjórnar sem er með hana til efnislegrar meðferðar. Þar kemur m.a. fram að hlutverk hafnarinnar okkar er að veita skipum öryggi og þjónustu. Framtíðarsýn hafnarinnar er að verða í fararbroddi sjávarútvegshafna landsins.
Grindavík er ein stærsta verstöð landsins. Hafnarsvæðið er lífæð Grindavíkurbæjar. Sjávarútvegurinn er hér í öndvegi en Grindavík er langstærsti saltfiskútflytjandi landsins. Umsvif Grindavíkurhafnar eru mikil enda öflug sjávarútvegsfyrirtæki sem gera héðan út. Milli 30 og 40 þúsund tonnum af botnfiski hefur verið landað í Grindavíkurhöfn á ári undanfarin ár. Fimm stærstu sjávarútvegsfyrirtækin skapa rúmlega 700 bein störf í Grindavík við veiðar og vinnslu. Auk þess eru fyrirtækin með rekstur víða annarsstaðar um landið sem skapar hundruði starfa til viðbótar, m.a. í Vogum, á Þingeyri, Húsavík, Djúpavogi, Reykjanesbæ og víðar. Það má því hæglega halda því fram að sjávarútvegsfyrirtækin í Grindavík skapi um 1.000 bein störf við veiðar og vinnslu á Íslandi. Eru þá ótalin störf við fjölda smærri sjávarútvegsfyrirtækja. Fjöldi afleiddra starfa sem sjávarútvegur í Grindavík skapar hleypur á hundruðum. Útflutningsverðmæti þess afla sem landað er í Grindavík eru líklega um 20 milljarðar ári sem er um 4% heildar útflutningsverðmæta Íslendinga. Innflutningur um höfnina felst aðallega í salti frá Spáni og Túnis. Fiskveiðar skipa sem gerð eru út frá Grindavík hafa á undanförnum áratug þróast úr veiðum með mismunandi veiðafærum á tveimur til þremur tímabilum á ári yfir í það að veiða með einu veiðafæri allt árið. Stærsti hluti aflans sem landaður er hér kemur af togskipum, frystitogurum og línuvélabeitningabátum. Þorskur, ýsa, keila og langa eru algengustu tegundirnar. Auk þess landa hér netabátar og handfærabátar og á vorin koma hingað grásleppubátar.
Skipum hefur fækkað á undanförnum árum og sérhæfing orðið meiri. Árið 2012 voru gerðir út frá Grindavík þrír frystitogarar og tveir ferskfisktogarar, 10 stór línuskip 35-55 m löng og 12 smærri línuveiðiskip c.a. 15 m löng, tveir snurvoðabátar og tveir netabátar. Þessu til viðbótar eru um 10-15 handfærabátar. Flestir þeirra fara í dagróðra. Auk þess landa hér nokkur skip sem hafa aðra heimahöfn en Grindavík. Fiskimenn í Grindavík sækja á sömu aflamið og forfeður þeirra öldum saman sem er til marks um hófsama veiðar án rányrkju. Grindavíkurhöfn veitir almenna hafnarþjónustu eins og hafnsögu, vigtun, afgreiðslu á ferskvatni, rafmagni, og sorphirðu. Starfsemi er samkvæmt samþykkt hafnarstjórnar og hafnalögum. Starfsemin tekur til afgreiðslu og þjónustu skipa, afgreiðslu á vörum, ökutækjum og farþegum og við lönd-un á fiski.
Eftir dýpkunarframkvæmdir í ár er vilji bæjaryfirvalda að vinna að mótun framtíðarsýnar Grindavíkurhafnar til þess að gera markaðssetningu markvissari, fá fleiri skip og auka tekjur.
(Greinin er úr Járngerði, fréttabréfi Grindavíkurbæjar).
Mynd: Haraldur Hjálmarsson.