Sigmar Björnsson og Ásbjörn Helgi Árnason eru eigendur fyrirtækisins. Sigmar var lengst af í útgerð nótaskipa, fyrst Þórshamars GK og síðar Guðrúnar Gísladóttur KE sem sökk við Noregi fyrir nokkrum árum. Sigmar sagði í samtali við Fiskifréttir að eftir að Guðrún Gísladóttir sökk hefði hann verið efins um það hvort hann ætlaði í útgerð á ný, en fyrir tveimur árum hefði hann slegið til og eignast fyrsta smábátinn, Arnar KE. Þegar hann var inntur eftir því hvers vegna hann hefði valið smábátakerfið svaraði hann því til að á þeim tíma hefði ekki verið um neinn annan kost að velja. Festi ehf. hefur nú yfir að ráða um 1.500 þorskígildistonnum í smábátakerfinu og að auki eru samtals um 1.000 þorskígildistonn á dragnótabátunum tveimur, Ósk KE og Brík BA.