Hljómsveitarkeppnin Rokkstokk - laugardaginn 27. október

  • Fréttir frá Ţrumunni
  • 10.10.2012
Hljómsveitarkeppnin Rokkstokk - laugardaginn 27. október

Rokkstokk 2012 fer fram í Frumleikhúsinu í Reykjanesbæ laugardaginn 27. október. Þar gefst tónlistarfólki á aldrinum 13-25 ára tækifæri til að koma fram við bestu aðstæður í skemmtilegri hljómsveitarkeppni. Það komast einungis 15 atriði að á Rokkstokk 2012 svo að það tónlistarfólk sem vill taka þátt þarf að bregðast fljótt við. Hægt er að skrá sig til þátttöku og fá nánari upplýsingar á heimasíðunni www.rokkstokk.net.

Rokkstokk 2012 fer fram á vegum SamSuð, sem er samstarfsvettvangur félagsmiðstöðva á Suðurnesjum, og er styrkt af Menningarráði Suðurnesja. Samstarfsaðili er Rás 2 sem mun taka upp Rokkstokk 2012 og verður afraksturinn sendur út í þættinum Skúrnum. Veitt verða vegleg peningaverðlaun fyrir fyrsta sæti (100.000 kr.) auk þess sem áhorfendur í sal munu velja eina hljómsveit sem mun fá sérstaka viðurkenningu.

Hljómsveitarkeppnin Rokkstokk fór fram á vegum Félagsmiðstöðvarinnar Ungó í Félagsbíói árin 1997-1999 en lagðist svo af. Margir tónlistarmenn sem síðar hafa látið mikið að sér kveða fengu þar dýrmæta reynslu. Félagsmiðstöðvarnar á Suðunesjum endurvöktu keppnina 2010 og vilja með þessu framtaki leggja sitt af mörkum til þess að svæðið haldi áfram að vera uppspretta hæfileikraríkra tónlistarmanna sem vekja athygli á landsvísu.

Hljómsveitin The Wicked Strangers frá Selfossi og Eyrarbakka sigraði á Rokkstokk 2011.
Kristjón Freyr var valin besta hljómsveitin af áhorfendum.

Hljómsveitin SkyReports frá Reykjanesbæ sigraði á Rokkstokk 2010. Keanu lenti í öðru sæti og Reason To Belive var valin besta hljómsveitin af áhorfendum.

Deildu ţessari frétt