Á síðasta fiskveiðiári voru skip með heimahöfn í Grindavík sem fyrr með mestar aflaheimildir í þorski eða 13.768 tonn sem eru 9,7% af úthlutuðu aflamarki í þorski. Næstir komu bátar með heimahöfn í Vestmannaeyjum með 10.520 tonn (7,4%) og síðan bátar skráðir í Reykjavík með 8.850 tonn (7,2%).
Athygli vekur skarpur samdráttur í aflaheimildum í þorski á Skagaströnd þar sem aflamarkið í þorski var 1.741 tonn fiskveiðiárið 2011/2012 en 3.934 fiskveiðiárið 2010/2011.
Hafnir á Norðurlandi eystra með mest aflamark
Þegar litið er til landshluta þá voru mestar aflaheimildir bundnar við heimahafnir á Norðurlandi eystra, en þær voru með 61.486 þorskígildistonn sem eru 19,9% af heildinni. Þetta eru hafnirnar frá Haganesvík austur til Þórshafnar. Á höfuðborgarsvæðinu voru aflaheimildirnar næstmestar eða 45.984 þorskígildistonn sem eru 14,9% af heildarúthlutuninni.
Þegar skoðuð er þróunin undanfarin fimm fiskveiðiár sést að nokkur samdráttur hefur átt sér stað á Suðurnesjum og Norðurlandi eystra. Suðurnes hafa engu að síður aukið hlut sinn í veiðiheimildum miðað við stöðuna fiskveiðiárið 2000/2001 á meðan þróunin hefur verið niður á við á Norðurlandi eystra undanfarin 10 ár og hið sama má segja um þróunina á Austurlandi. Höfuðborgarsvæðið hefur aukið hlut sinn á undanförnum fimm árum en Suðurland, Vesturland og Norðurland vestra hafa haldið sínu og vel það undanfarin tíu ár. Hlutur Vestfirðinga í veiðiheimildunm hefur farið vaxandi undanfarin tíu ár, heimildir þar voru komnar í 9,8% heildaraflamarksins fiskveiðiárið 2011/2012 samanborið við 7,6% fiskveiðiárið 2000/2001.
Á síðasta fiskveiðiári voru bátar skráðir með heimahöfn í Reykjavík með mestar aflaheimildir eða 35.282 þorskígildistonn sem eru 11,4% úthlutaðra aflaheimilda samanborið við 14,2% fiskveiðiárið 2010/2011. Næst komu bátar skráðir í Vestmannaeyjum með 30.162 þorskígildistonn eða 9,8% allra aflaheimilda og síðan bátar skráðir í Grindavík með 27.644 þorskígildistonn (9,0% aflaheimilda).
Sjá nánar hér á heimasíðu Fiskistofu.