Starfsemi félagsmiðstöðvarinnar Þrumunnar hefur tekið nokkrum breytingum, þar eru nýjir starfsmenn, nýjir klúbbar og ný aðstaða. Félagsmiðstöðin Þruman flutti í sumar úr Kvennó yfir í Grunnskóla Grindavíkur. Félagsmiðstöðin er því opin á skólatíma fyrir unglingastigið og geta þau því eytt bæði frímínútum og eyðum í stundatöflu í félagsmiðstöðinni sinni. Hefðbundið starf verður síðan á kvöldin fyrir 8.-10. bekk eins og hefð er fyrir. Þruman ætlar að leggja aukna áherslu á Klúbbastarf í vetur og verða fjórir klúbbar í boði.
Áframhald verður á vinsælu Stráka- og Stelpuklúbbunum. Síðan verður boðið uppá Fjölmiðlaklúbb og Ævintýraklúbb. Starfið hefur farið mjög vel af stað og m.a. búið að halda nokkra viðburði sem gengið hafa vel. Ljóst er að þessi breyting, að færa Þrumuna inn í grunnskólann, hefur mælst mjög vel fyrir hjá ungmennunum. Hins vegar á eftir að lagfæra aðstöðuna í skólanum til að skapa meira pláss fyrir starfsemina. Verður ráðist í þær framkvæmdir á næsta ári og verður starfsemin og aðstaðan þróuð áfram í samstarfi við ungmennin því þetta er jú starfsemin þeirra.
Þruman er einnig í góðu samstarfi við félagsmiðstöðvar á Suðurnesjum og halda þær nokkrar skemmtanir á starfsárinu undir merkjum Samsuð. Síðan verður farið á stærstu Samfés viðburðina en það eru samtök allra félagsmiðstöðva á Íslandi.
5.-7. bekkur
Þruman bíður einnig upp á starfsemi fyrir 5. - 7. bekk tvisvar í viku eftir skóla:
• Miðvikudögum kl. 17:00-18:30 - Skipulögð dagskrá
• Föstudögum kl. 13:30-15:00 Opið hús
Þar er ýmislegt skemmtilegt gert t.d ratleikir, kappát, bíókvöld, bingó og margt fleira.
Opið er alla daga frá 8:00-14:00
8.- 10. bekkur kl. 20:00-22:00
Mánudaga - Stelpu og Strákaklúbbur (annan hvern mánudag)
Þriðjudaga - Opið hús
Miðvikudagar - Fjölmiðlakúbbur, Ævintýra-klúbbur (annan hvern miðvikudag)
Fimmtudaga - Lokað
Föstudaga - Opið hús
Nánari upplýsingar um dagskrá Þrumunnar má finna á heimasíðu Grindavíkurbæjar, www.grindavik.is/thruman sem og á Facebook síðu Þrumunnar.
Jóhann Árni Ólafsson er frístundaleiðbeinandi og aðrir starfsmenn Þrumunnar eru Hanna Dís Gestsdóttir, Bjarni Þórarinn Hallfreðsson, Jens Valgeir Óskarsson o.fl. Ábyrgðarmaður er Þorsteinn Gunnarsson sviðsstjóri frístunda- og menningarsviðs.