Bræðurnir Einar Þór og Eiríkur Óli í fyrsta bekk komu með tvær hauskúpur af kindum í skólann í dag og sýndu bekkjarsystkinum sínum. Þeir sögðu frá því að báðar hauskúpurnar hafi pabbi þeirra fundið í Svefneyjum á Breiðafirði en fjölskylda þeirra á sumarhús þar og bræðurnir fara oft þangað á sumrin. Önnur hauskúpan var brún og hin hvít. Sú brúna er af hrút og fannst ofan í mýri sem var verið að grafa skurð í gegnum, þess vegna er hún svona brún. Einar og Eiríkur halda að hrúturinn hafi verið á leið í fjárhúsin sem eru rétt hjá þegar hann datt ofan í. Hann hefur eflaust dáið því hann fékk ekki að borða og komst ekki upp úr skurðinum. Einar og Eiríkur sögðu krökkunum frá því að pabbi þeirra og allir hinir sem voru í þessari ferð voru að grafa skurð til að gera flugbraut í Svefneyjum.
Hvíta hauskúpan fannst í Feginbrekkum, sem er næsta eyja við Svefneyjar. Þegar það er fjara er hægt að ganga yfir í Feginbrekkur. En það er mikilvægt að passa sig að leggja ekki of seint af stað heim því þá getur verið komið flóð og þá þarf að sigla eða synda í sjónum. Þessi hauskúpa fannst bara í grasinu, svo kannski var kindin bara orðin gömul og villt þegar hún dó. Strákarnir sögðu líka frá því að þeir fara næst til Svefneyja í maí eða júní með fjölskyldunni að tína æðardún og þeir hlakka mjög mikið til.