Það var aldeilis stuð og stemming í Hópsskóla sl. miðvikudag en þá komu Valgerður Guðnadóttir söngkona og Hrönn Þráinsdóttir píanóleikari á vegum List fyrir alla í heimsókn og fluttu söngleikinn Björt í sumarhúsi fyrir börnin. Börnin skemmtu sér einstaklega vel og þekktu mörg ljóðin, þótt lögin hafi verið önnur en þau sem sungin eru í söngstund.
Björt í sumarhúsi er söngleikur fyrir börn eftir Elínu Gunnlaugsdóttur við texta Þórarins Eldjárns sem byggir á ljóðum úr bókinni ,,Gælur, fælur og þvælur”.
Söngleikurinn fjallar um hana Björt sem segir söguna, leikmunir eru í einni ferðatösku sem hún kemur með inn á sviðið. Um leið og hún segir sögu af því þegar hún fór í sumarbústað með afa og ömmu tínir hún eitt og annað upp úr töskunni t.d. fiskiflugu og kónguló. Báðir flytjendur taka þátt í sprellinu á sviðinu með ýmsum hætti.
Söngleikurinn Björt í sumarhúsi hefur komið út á bók útgefinni af Töfrahurð. Bókin er fallega myndskreytt af Sigrúnu Eldjárn og geisladiskur með sögunni og tónlistinni fylgir bókinni. Lesa má meira um þetta skemmtilega verk hér.