Skólastefna Grindavíkur var samþykkt formlega í fræðslunefnd þann 25. september síðastliðinn og samþykkt í bæjarstjórn 17. desember. Hún byggir á gögnum frá skólaþingi 12. janúar 2013, frá hópastarfi á starfsdögum um grunnþætti á skólaárinu 2012-2013 og samræðum vinnuhóps um endurskoðun skólastefnunnar. Endurskoðun skólastefnu er hluti af þróunarverkefni skólaskrifstofu Grindavíkur og allra skóla í Grindavík við innleiðingu nýrrar aðalnámskrár í skólastarfið.
Stýrihópur þróunarverkefnisins ákvað samsetningu vinnuhópsins og skólar tilnefndu síðan fulltrúa.
Í vinnuhópnum voru:
- Þórunn Svava Róbertsdóttir fulltrúi fræðslunefndar
- Bylgja Kristín Héðinsdóttir aðstoðarleikskólastjóri Leikskólanum Króki
- Sigríður Guðmundsdóttir Hammer kennari Leikskólanum Laut
- Valgerður Ágústsdóttir fyrir hönd foreldra leikskólabarna
- María Eir Magnúsdóttir kennari Grunnskólans í Grindavík
- Kristjana Jónsdóttir kennari Grunnskólans í Gr.
- Sigurbjörg Guðmundsdóttir frá foreldrafélagi grunnskólans
- Halldór Lárusson/Inga Þórðardóttir skólastjóri Tónlistarskóla Grindavíkur
- Bjarnfríður Jónsdóttir sérkennsluráðgjafi á Skólaskrifstofu Grindavíkur
- Kristinn Reimarsson frístunda- og menningarfulltrúi Grindavíkurbæjar
- Ingibjörg María Guðmundsdóttir sálfræðingur Skólaskrifstofu Grindavíkur
Skólastefnunni er ætlað að taka til allra þátta í uppeldis- og skólastarfi bæjarins. Markmiðið er að skapa framtíðarsýn í málaflokknum til næstu fjögurra ára og vera málefnalegur grundvöllur að umfjöllun og ákvörðunartöku um skólastarf í sveitarfélaginu. Vinna við innleiðingu á nýjum aðalnámskrám hófst formlega með umsókn í Sprotasjóð í febrúar 2012. Kynning á nýrri menntastefnu og grunnþáttum var í ágúst á vegum menntamálaráðuneytis og starfsdagar voru fjórir þar sem unnið var með grunnþættina og þeir tengdir skólastarfi þvert á skóla og stig. Í janúar var íbúaþing þar sem skoðanir íbúa fengust um hvernig grunn- þættirnir ættu að birtast í skólastarfi í Grindavík. Stýrihópur hefur verið að störfum frá vori 2012 og sérstakur vinnuhópur í endurskoðun skólastefnunnar með fulltrúum frá öllum hagsmunaaðilum.
Eftirfarandi stefnumótandi markmið eru sett fram um ofangreinda starfsemi. Það er síðan á ábyrgð hverrar stofnunnar að útfæra leiðir í skólanámskrá og starfsáætlun til þess að framfylgja stefnunni. Skólaskrifstofu Grindavíkur er ætlað að fylgja stefnunni eftir í samvinnu við forstöðumenn stofnanna.